Despuish la renavida de Nosauts de Bigòrra, en 1997, qu'avem inscriut la nosta accion dens :

Ua auhèrta d'animacions en occitan pro desparièras : dab la venguda deus cantaires provençaus : Gacha Empega, Massilia Sound System ; la canta tostemps dab gropes de las Valadas occitanas coma lo Seriol, los bascos de Sustraia, los biarnés de la Familha Artús, o Verd e Blu, los aragonés de la Orquestina de Fabirol, los bascos de Tarba, los bigordans Eths Bandolets, Parpalhon, los Pastors d'Azereix, Eths Plantagulhes d'Ibos, los de Sarniguet, los de Semiac e mantuns còps los Nadau.

Qu'avem podut auherir tanben d'autes espectacles : teatre, bals gascons... e tanben despuish 2001, au parat de l'Annada Europenca de las Lengas, que metem a l'aunor lo fèit occitan dens un hestau nomat Pirelengas dab desbats, coferença, danças e musicas.

Que participam a manifestacions culturaus dens tot lo despartament e qu'èm estacats au fèit de hèr partenariats. Qu'ei lo parat de téisher ligams, partatjar, víver moments de convivialitat en tot her descobrir e aimar lo patrimòni occitan.